Jean d'Antioche's Translation of Ciceronian Rhetoric in Latin and French

[13A] Ci comense Rectorique de Marc . T. Cyceron, la quel maistre Johan d'Anthioche translata de latin en romans a la requeste de frere .G. de l'Ospital de s(aint) Johan de Jerusalem l'an de l'incarnation .mcclxxxii. .ll.

Mout ai ce pencé et sovent se l'abondance de parler et le soverain estude d'eloquence ait plus fait de mal ou de bien as homes et as cytez dou monde; quar, quant je regars les amermances de nostre chose publique ou comune et je aünc en mon corage et assemble les ancienes chaitivetez et les degastemens des tres grans cytez, je voi que la greignor partie des domages est avenue par les homes trop en- [13B] parlez. Mais quant je bien recors par les amonicions des letres et par les ancienes ystoires les choses qui par ancieneté sont esloignees de nostre memoire et ostees, je truis et entens que mointes cytez sont ordenees et establies et plusors batailles sont restaintes et rapaisces et tres fermes compaignies et tres saintes amistances sont aquises plus legierement et faites que par la raison dou corage que par la faconde de parler. Et en tel maniere longuement pensant, la vive raison me mena meismement a ceste sentence que je cuidasse certainement que le sens sans eloquence peut profiter aucune chose as contez, mais eloquence ou faconde de parler sans le sens mointes fois peut trop nuire mais profiter jamais. Por la quel chose je di que se aucun delaisse et met arrieres les tres honestes et droituriers estudes de raison et d'ofice et consume toute sa paine et s'ayde au hantement de dire et de parler, cestui se norrir ét se fait neent profitable a soi et domageus cyteyen a son pays; mais qui s'arme et se garnist en tel maniere d'eloquence qu'il puisse combatre por les profis de son pays, non pas contr'eaus se fait [13C] et s'atorne combatre, itel home — ce m'est avis — amiable cyteyen et tres profitable as siens et a comunes raisons et publiques de son pays.

Et se nos volons bien regarder le comencement de ceste chose qui est apelee eloquence, s'ele est venue de nature, d'art ou de estude ou d'aucun hantement ou de science, nos troverons que ele a eü comencement et naissance de tres honestes causes et tres bones raisons. Quar il fu jadis .i. tens que les homes aloient vagant comunaument as chans en maniere de bestes et multeplioient lor vie par vivre bestial, qu'ausi come bestes sauvages desmesurcement et par fierté vivoient, et nule riens n'amenistroient par raison de corage mais toutes choses faisoient par force de cors. Encore la raison de la devine religion et de l'umain office n'estoit pas coneüe ne cultivee: nul ne savoit encores quel chose fucent noces ne leaus espousailles, nulz hom n'avoit encores veü ne concü certains filz ou enfans, ne quel chose fust droit ne leauté ne igalité ou droiture, ne quel profit tenissent. Et en tel maniere, par tel errour et par tel ignorance, la seignorel covoitise de l'umain corage estoit aveugle et foleante, a emplir soi et complir usoit malement et s'aydoit des forces dou cors [13D] ausi come de tres domageus menistres. En icel tens .i. vaillant home et sage s'apensa et aparsut quel matiere et quel covenable raison et conoissance seroit es corages des homes a trop grant chose atraitier, s'il y eüst qui la porroit dehlicer et metre avant et qui la peüst en comandant ou par comandement rendre plus clerc et meaudre. Lors comensa il a assembler les homes qui estoient espandus es chans et par bois et par forest en sauvages habitacles, et par une maniere de raison les aüna en .i. leu ausi come a force et les comensa a aleguer et moustrer chascune raison qui profitable lor estoit et honeste. Icil, qui n'avoient pas apris ne acoustumé d'oyr si faite chose, comencierent premierement por la desacoustumance orgueillousement a crier; puis aprés por les raisons et l'aornee parole oieent plus ententivement et volentiers. Et tant esploita cil et fist, que de fiers homes et sauvages il en rendi et fist privez et debonaires.

Mais sertes il ne m'est pas avis que, en ce qui est dessus dit, peüst avoir tant profité le sens taisible et sans faconde de parler qu'il convertist soudainement les homes de lor sauvage coustume et anciene et les ramenast a diverses raisons de vie. Qui bai- [14A] llast ores les raisons de vie as cytez et feyst que les cytez establies apreyssent a cultiver foy et a retenir justise et acoustumacent obeyr as autres par lor volenté (il ne cuideroient pas soulement recevoir travail par l'achoison dou comunal profit, mais cuideroient perdre la vie), la quel chose peut estre faite a la parfin, se les homes ne peüssent avoir amonesté par eloquence ce que il trovassent et entendissent par raison? Sertes nul home qui eiist grant pooir vodroit sans force descendre au droit, qu'il soufrist estre igal et pareil a ceaus que il porroit surmonter et que il se departist par sa volenté de la mignote costume de son corage et orgueillouse, se il ne fust amonesté et esmeü par soeve raison de parler et sagement aornee; la quele coustume de corage ja tenist force de nature por l'antiquité et seroit come naturel se n'estoit eloquence. Par tel maniere donques et tel enging est il avis que eloquence ot premierement naissance et comencement et s'en eissi et s'en avansa plus loing, et puis fu conversee et repaira en trop grans choses et grans faiz de pais et de bataille au soverain profit des homes. Mais puis que .i. petit profit qui [14B] a semblance de vertu sans raison d'ofice et de sen aquist abondance de dire et de parler engignousement, et par usance de malice encomensa ou acoustuma de pervertir les cytez et de gaster les vies des homes.

Et por ce que nos avons dit dessus et esclarci le comencement dou bien, si desplions ores et disons le comencement de ce mal et sa naissance. Verité me semble que .i. tens fu que les enfans et les homes neent sages ne soloient pas repairier es choses publiques et comunes, ne les grans homes ausi qui esteent trop enparlez s'aprocheent as privees causes des plais et des conseilz. Et quant ce fu donc ensi que les tres grans choses et les grans faiz estoient amenistrees soulement par les soverains homes, je cuit et croi que aucuns autres homes furent visious et malicious qui se aprochoient as petis plais et as estris des privees choses. Et quant les homes se acoustumoient sovent en itelz estris de contraster a la verité par mensonge et le faisoient assiduelment, par l'assiduance de parler lor crut corage et hardiece; ensi que il convenoit entremetre les plus soverains par fine force en cel contrast, que chascuns d'eaus par les injures des cyteyens contrestast as hardis et [14C] aydast ses necessaires. Et en tele maniere sovent avenoit que, quant cil qui estoit pareil et igal as autres sembloit tousjors en parlant qu'il fust le plus soverain, quiconques avoit lors laissié l'estude de sapience et n'avoit autre chose en soi mais que la pure eloquence sembloit avis, par le jugement de mout de gent et par le sien, que il fust dignes de governer la chose publique. Donc n'estoit pas mereveille si tres chaitis perilz et trop grans domages avenoient por ce, mais a bon droit, quant les presumtueus homes et de fole hardiece s'aprochoient as governemens de la chose publique. Por la quel chose en tant de hayne et d'envie fu eloquence que les engignous homes et bien entendans, ausi come d'une trouble tempeste en .i. port de bonace, en tel maniere s'enfuyoient de tel nuisouse vie et plaine de tençons et S'adonoient en aucun autre estude reposé. Por coi il m'est avis que puis aprés tous les autres estudes droituriers et honestes qui estoient mis en huisouseté resplendirent de tres vaillans homes et bons, mais cestui fu deguerpi et delaissié de plusors en cel tens quant l'on le devoit plus vigrousement retenir et plus estudiousement [14D] acroistre.

Quar quant plus indignement la presumptuouseté des fos et la hardiece des mauvais corrompent la tres honeste chose et tres droituriere a damage et a la grant amermance de la chose publique, de tant plus estudiousement lor devoit l'on contraster et a la chose publique conseillier. La quel chose nen eschiva pas a faire icelui nostre Caton, ne Leli, ne lor voir disant desciple Affriquan, ne Cracs les nevous d'Aufrican, qui resplendissoient trestous de souveraine vertu et de auctorité bien ample et espandue par lor soveraine vertu et d'eloquence autresi, qui aveuc ces choses seroit a l'aornement et au secours de la chose publique. Dont nos devons, par mon los et mon conseil, estudier en eloquence: et se priveement et en apert aucuns l'usent mauvaisement, de tant devons estudier en lui plus vigrousement que les mauvais n'aient trop grant pooir a l'amermance des bons et au comunal domage de tous; et por ce meismement que ce est une chose qui apartient especiaument a toutes choses privees et publiques, par ceste chose l'umaine vie en devient schure et honeste, par ceste chose devient ele noble et joiouse. Quar de ceste [15Al chose, ce est d'eloquence, plusors profiz resortissent et vienent a la chose publique si sapience, qui toutes choses a tempré et a faite, li est presente: de eloquence avient a ceaus qui l'ont aquise loenge, honor et dignité, et de ileuc en aquierent lor amis sertain secours et tres seür. Et il me est avis que les homes qui par nature en toutes choses sont plus umbles et plus febles, en ceste chose meismement que il pevent parler valent il meaus que les bestes: por coi je di que noble chose et preciouse a gaaignee et aquise celui qui en cele chose surmonte les homes en la quele les homes valent meaus des bestes. Et se ceste chose par aventure ne peut l'on aquerre orendroit ne par nature ne par hantement, si la conquerra par office et par voi d'art: non est pas en ceste euvre estrange chose a veyr ce que ceaus dient qui aucuns comandemens de cest art nos ont laissié. Mais avant que dions des comandemens oratoires, ce est de rectorique, si devons dire dou material comencement de cele art, de son office, de sa fin, de sa matiere et de ses parties; quar tandis come ces choses seront coneües, plus legierement et plus delivrement porra le corage de chascun veyr [15B] et entendre la raison et la voie de l'art.